धनकुटा - ‘पूर्वाञ्चल गट ट्यालेन्ट’ सिजन ६ को पहिलो अडिसन आगामी भदौ १ गते भोजपुरबाट सुरु हुने भएको छ । 

रिक्रियशन मल्टिमिडिया एण्ड इन्टरटेन्टमेन्ट प्रालि र टिन्ज डान्स सेन्टर धनकुटाको आयोजनामा हुने कार्यक्रममा गायन तथा नृत्य विधामा प्रतिस्पर्धा हुने आयोजकले पत्रकार सम्मेलन गरेर जानकारी दिएको हो । 

प्रतियोगिताको गायन विजेताले पाँच लाख रुपैयाँ तथा पाँच लाख बराबरको जीवन बिमा र गीत रेकर्ड गर्ने मौका पाउनेछन् भने नृत्य तर्फको विजेताले पाँच लाख रुपैयाँ तथा पाँच लाख बराबरको जीवन बिमा गरिने बताइएको छ । प्रतियोगिताको दोस्रो र तेस्रो हुनेको लागि कार्यक्रम अवधिभित्र पुरस्कार खुलाइने आयोजकले जनाएको छ । 

प्रतियोगिताको भदौ १ गते भोजपुरमा सुरु भएर मङ्सिर २२ गते धनकुटा जिल्ला अडिसन हुनेछ । कोशी प्रदेशका विभिन्न १२ ठाउँमा हुने अडिसनमा नेपालभरिका जोसुकैले भाग लिन पाउने प्रतियोगिताका कार्यक्रम संयोजक सुमन योगीले जानकारी दिए । 

जिल्ला अडिसन पछि मुख्य कार्यक्रम धनकुटामा हुने जनाइएको छ । जिल्ला अडिसनमा निर्णायकहरूमा नृत्यतर्फ सुमन योगी, युसिन यसमाली मगर र दिपेश मगर रहनेछन भने गायनतर्फ महेश राई र जुनी खालिङ राई रहने आयोजकले बताएको छ । फाइनलको निर्णायक राष्ट्रिय कलाकार रहने आयोजकले जनाएको छ ।