Techie IT
×
१ वैशाख, २०७८, बुधबार
जम्मा संक्रमित (नेपाल)
निको भएको
मृत्यु
जम्मा संक्रमित (विश्व)
गृहपृष्ठसमाचारपोखरा–बागलुङ राजमार्ग फराकिलो बनाउने काम तीव्र

पोखरा–बागलुङ राजमार्ग फराकिलो बनाउने काम तीव्र


 पोखरादेखि धौलागिरि अञ्चलका चार जिल्ला जोड्ने एकमात्र सडक पोखरा–बागलुङ राजमार्ग फराकिलो बनाउने काम तीव्ररुपमा थालिएको छ ।  विगत लामो समयदेखि जीर्ण रहेको राजमार्ग वर्षांैदेखि टालटुलको भरमा चल्दै आएकामा यसपटक भने बृहत्रुपमा सुधार गर्न थालिएको हो ।

सडक विभागअन्तर्गत मध्यपहाडी आयोजनाले यो राजमार्गलाई नयाँ स्वरुपमा ढाल्ने गरी मर्मत सम्भारलाई गति दिएको छ । आयोजना पश्चिमखण्डका प्रमुख सूर्यबहादुर भाटले राजमार्गलाई पूरै नयाँ स्वरुपमा विस्तार र स्तरोन्नति गर्न थालिएको बताउनुभयो । अहिले चार वटा प्याकेजमा मर्मतसम्भारसहित राजमार्ग विस्तारको काम थालिएको उहाँले बताउनुभयो ।

बहत्तर किमी लामो पोखरा–बागलुङ सडकको अधिकाँश भाग तीन वर्षको अबधिमा नयाँ बन्नेछ । “पोखरा–बागलुङ राजमार्गमा यातायात सञ्चालन गर्न निकै अप्ठेरो थियो” प्रमुख भाटले भन्नुभयो, “अबको तीनवर्षभित्र यो राजमार्ग पूरै नयाँ बन्नेछ, दोहोरो सवारी चल्न मिल्नेगरी सडकले आकार लिनेछ ।”

राजमार्ग विस्तार र मर्मतको काम गत कात्तिकदेखि शुरु भएको हो । चार चरणमा सम्पन्न गर्ने आयोजनाको पहिलो चरणमा पोखराको जिरो किलोमिटरदेखि याम्दीसम्म छ किमी, दोश्रो चरणमा याम्दीदेखि घट्टेखोलासम्मको खण्ड, तेश्रो चरणमा घट्टेखोलादेखि नयाँपुलसम्मको करिब २५ किमी र चौथों चरणमा नयाँपुलदेखि पर्वतको मालढुंगासम्मको खण्ड (२४ किमी) मर्मतसम्भार र विस्तार गर्ने प्रमुख भाटले जानकारी दिनुभयो ।

उहाँका अनुसार पोखराको जिरो किलोमिटरदेखि याम्दीसम्म छ लेनको सडक तयार हुनेछ भने फेदीसम्म पनि छ लेनको सडक बन्ने भएको छ । फेदीदेखि घट्टेखोलासम्म नौ मिटर फराकिलो सडक बन्ने भएको छ ।

करिब रु तीन अर्ब ३२ करोडको लागतमा सडक विस्तार र स्तरोन्नति गर्न थालिएको छ । यसका लागि चार वटा निर्माण कम्पनीले काम गर्ने पनि प्रमुख भाटले जानकारी दिनुभयो ।

कास्कीको नयाँपुलदेखि पर्वतको कुश्मासम्मको खण्ड सबैभन्दा अप्ठेरो रहेको छ । ठाउँठाउँमा पहरो भएकाले चट्टान फुटाउन समस्या देखिएकाले यसको विस्तारमा समय लाग्नसक्ने बताइएको छ ।

यो राजमार्ग पछिल्लो समय भासिने समस्याले ग्रसित हुँदै आएको छ । वर्षेनी मर्मत भएपछि भासिन नछाडेपछि सडक पूरै नयाँ स्वरुपमा विस्तार गर्न जरुरी भएको थियो । यस सडकमा पर्ने पुल अझै साँघुरा भएकाले ती पुलको आकार बढाउनेबारे पनि छलफल भएको बताइएको छ ।

पोखरा–बागलुङ राजमार्ग करिब तीनदशकअघि चीन सरकारको सहयोगमा बनेको हो । चीनले उक्त राजमार्गलाई आव २०५०÷५१ मा नेपाल सरकारलाई हस्तान्तरण गरेको थियो ।

पुनःनिर्माणका लागि पर्वतमा २५० डकर्मी खटाइँदै

भूकम्प गएको साढे दुई वर्ष बितिसक्दा पनि पर्वतमा पुनःनिर्माणले तीव्रता पाउन सकेको छैन ।

भूकम्पमा परी पूर्ण क्षति व्यहोरेका झण्डै पाँच हजार ३०० घर पुनःनिर्माणका लागि पर्वतमा २५० डकर्मी खटाइने भएको छ । दक्ष जनशक्तिको अभावमा पुनःनिर्माणले गति लिन नसकेका बेला भूकम्प पुनःनिर्माण प्राधिकरणले पर्वतमा तालीम प्राप्त डकर्मीलाई परिचालन गर्ने भएको हो ।

प्राधिकरणको निर्देशनमा घरेलु तथा साना उद्योग विकास समिति पर्वतले डकर्मीलाई तालीम दिने तयारी गरेको छ । आगामी माघ १५ गतेभित्र सबै डकर्मीलाई तालीम दिइने घरेलु तथा साना उद्योग विकास समिति पर्वतका कार्यालय प्रमुख विष्णुप्रसाद न्यौपानेले जानकारी दिनुभयो ।

भूकम्पले भत्किएका संरचना निर्माणका लागि दक्ष जनशक्ति अभाव नहोस् भनेर डकर्मी तयार गर्न लागिएको उहाँले बताउनुभयो ।

प्रत्येक स्थानीय तहमा २५ देखि ५० जनासम्म दक्ष डकर्मी उत्पादन गर्ने प्राधिकरणको निर्देशनानुसार कार्यालयले कुश्मा र फलेवास नगरपालिका तथा बिहादी गाउँपालिकामा ५०÷५० जनाका दरले र बाँकी गाउँपालिकामा २५ जनाका दरले डकर्मीलाई तालीम दिने जनाएको छ । कम क्षति भएका जलजला, मोदी, महाशिला र पैंयु गाउँपालिकामा २५÷२५ जनालाई तालीम दिइने भएको छ ।

साढे दुई वर्षअघि बनेका कतिपय घर लाभग्राहीले आफँै निर्माण गरिसकेका छन् भने कतिपयले प्राधिकरणको मापदण्डअनुसार नै बनाउने भन्दै अझै निर्माण गरेका छैनन् । ढिलैगरी भए पनि प्राधिकरणले दक्ष डकर्मी उत्पादन गरेर परिचालन गर्ने निर्णय गरेपछि पीडितहरु लाभान्वित हुने भएका छन् । भूकम्पबाट पर्वतमा पाँच हजार २६९ घर पूर्ण रुपमा क्षति भएका छन् ।

जिल्ला समन्वय समिति पर्वतका अनुसार हालसम्म पहिलो किस्ताको रकम चार हजार ७० जनाले बुझिसकेका छन् । चार हजार ६०० जनालाई पहिलो किस्ताको रकम उपलब्ध गराउन सिफारिस गरेकामा अझै ५३० जनाले रकम बुझेका छैनन् । पूर्ण क्षतिमा विवरण लेखाएर पहिलो किस्ताको रकम बुझेका झण्डै ३० प्रतिशत लाभग्राहीले भने सोही घरमा बस्दै आएको छ ।

पर्वतमा सबैभन्दा बढी क्षति बिहादी गाउँपालिकाको रानीपानी, कुश्मा नगरपालिकाको पकुवा, मोदी गाउँपालिकाको गिज्यानमा भएको थियो । पछिल्लो समय जिल्लाका सबै स्थानीय तहमा इञ्जिनियर परिचालन गरिएको छ । क्षतिको अवस्था हेरेर एक वा दुईजनाका दरले सबै स्थानीय तहमा इञ्जिनियर खटिएपछि नयाँ घर निर्माण गर्नेहरुलाई सहज भएको छ ।




तपाईको प्रतिक्रिया दिनुहोस