काठमाडौँ - उपप्रधान तथा गृहमन्त्री रवि लामिछानेले मनसुनजन्य विपद्बाट वाट हुन सक्ने सम्भावित क्षति रोक्न जोखिम प्रभावित क्षेत्रमा जनशक्ति परिचालन गर्न निर्देशन दिएका छन् ।

मनसुन पूर्व तयारी तथा प्रतिकार्य, राष्ट्रिय कार्ययोजना,२०८१ माथि आज गृह मन्त्रालयमा भएको छलफलमा गृहमन्त्री लामिछानेले विपद्को अति जोखिम भएका ठाउँमा सूचना दिने गरी तत्काल जनशक्ति खटाउन मातहतका निकायलाई निर्देशन दिएका हुन् ।

गृहमन्त्री लामिछानेले सम्भावित क्षति न्यूनीकरणका लागि  अन्तर निकाय समन्वय, साझेदार निकाय, दातृ निकाय बिच निरन्तर छलफल गरी गृह मन्त्रालयको नेतृत्वमा एकीकृत सहायता प्रणालीको स्थापना गर्नुपर्नेमा जोड दिए ।लामिछानेले प्रत्येक जिल्लामा अस्थायी सहायता केन्द्र, टेलिफोन केन्द्र,विपद प्रभावित क्षेत्रमा निशूल्क टेलिफोन सेवा, स्वास्थ्य सेवाको अभाव नहुने गरी प्रबन्ध मिलाउन समेत निर्देशन दिए ।

छलफलमा  गृह सचिव एकनारायण अर्यालले  विगतमा विपद्का समयमा राहत र उद्धारमा हुने गरेको ढिलासुस्ती र अन्यौलता हटाउन समन्वयलाई थप प्रभावकारी बनाइने बताए ।छलफलमा सहभागी विभिन्न संघ संस्थाका प्रमुख तथा प्रतिनिधिहरूले विपद्बाट हुन सक्ने सम्भावित क्षति न्यूनीकरणका लागि सरकारले साझेदार निकायसँग समन्वय गरी आवश्यक उपकरण र स्वयंसेवकको प्रबन्ध गर्नुपर्नेमा जोड दिए ।