भाषा, साहित्य र संस्कृति प्रवर्द्धनमा प्रज्ञा प्रतिष्ठानको भूमिका प्रशंसनीय छ : प्रधानमन्त्री देउवा

राजनीति / मनाेरञ्जन/ कला / धर्म-संस्कृति र रितिथिति

भाषा, साहित्य र संस्कृति प्रवर्द्धनमा प्रज्ञा प्रतिष्ठानको भूमिका प्रशंसनीय छ : प्रधानमन्त्री देउवा

पुलेसो
२०७९ असार ०९ बिहीबार

काठमाडौं - प्रधानमन्त्री शेरबहादुर देउवाले देशको भाषा, साहित्य एवम् संस्कृतको प्रवर्द्धनमा प्रज्ञा प्रतिष्ठानले खेलेको भूमिका प्रशंसनीय रहेको बताए ।

प्रतिष्ठानको ६५ औं वार्षिकोत्सबको अवसरमा बिहीबार आयोजित राष्ट्रिय कविता महोत्सवमा उनले सो कुरा बताएको हो ।प्रतिष्ठानले छ दशक लामो समयमा ज्ञान, विज्ञान, भाषा एवम् सांस्कृतिक क्षेत्रको महत्त्वलाई स्वदेशमा मात्र होइन, बाहिर चिनाउन अग्रणी संस्थाको रुपमा काम गर्दै आएको छ । उनले भने हाम्रो कला, संस्कृति प्रवर्द्धनका लागि छुट्टै कानुनी व्यवस्थामार्फत प्रतिष्ठान स्थापना भएको हो ।

प्रधानमन्त्री देउवाले २०६२/६३ सालको राजनीतिक परिवर्तनपछि नयाँ रुपान्तरण आएको उल्लेख गर्दै विभिन्न भाषा, साहित्य, दर्शन र समाजशास्त्रको संरक्षणमा पनि प्रतिष्ठानले योगदान पुर्याउँदै आएको बताए ।उनले भने ,नयाँ रुपान्तरणसँगै बहुजातीय, बहुभाषिक सम्बोधन गर्नेगरी कृतिहरु, प्रचलित भाषा, साहित्य, संस्कृति र भूगोल तिनीहरुको एकता बढाउन सिर्जनशील कार्यक्रम प्रज्ञा प्रतिष्ठानले गर्दै आएको छ ।

देशका सबै समुदायको भाषा एवम् सांस्कृतिक दर्शनको प्रवर्द्धनमा योगदान पुर्याउन जोड दिदै उनले काठमाडौंको मैतीदेवीमा महाकवि लक्ष्मीप्रसाद देवकोटा संग्रहालय निर्माणका विषयमा खुसी प्रकट गरे।नेपाली बृहत् शब्दकोष डिजिटल प्रणाली र एप निर्माण र सञ्चालनको कार्य सकारात्मक रहेको पनि उनको भनाइ छ ।

प्रतिष्ठानको यसखाले कार्यमा नेपाल सरकारले सधैँ सहयोग गर्ने प्रतिबद्धता जनाउदै प्रधानमन्त्री देउवाले महोत्सवमा सम्मानित एवम् सबैमा बधाई एवम् शुभकामना व्यक्त गरे।